कोकणातील बहुप्रिय “नमन” लोककलेचा १२ जानेवारी २०२३ रोजी रंगणार मुंबई येथे रंगभूमीवर प्रयोग
(दिशा महाराष्ट्राची / मुंबई- उदय दणदणे )
कोकणातील पारंपरिक लोककला होळी आणि गणेशोत्सव हे कोकणातील खरे खुरे उत्सव. या दोन्ही उत्सवासाठी इथला शेतकरी मोकळा असतो.भाताची लावणी संपली की घरोघरी गणपती येतात आणि भाताची कापणी /मळणी संपताच शिमग्याचे म्हणजेच होळीचे वेध लागतात.कोकणातील या दोन्ही सणांशी इथल्या लोककला निगडीत आहेत.मग जाखडी नृत्य, भारुड असो किंवा नमन या कलेवर जिवापाड प्रेम करणारे रसिक नेहमीच या कलेचा आनंद लुटायला आतुर झालेले असतात.
कोकणची पारंपारिक लोककला म्हणून ” नमन” या कलेकडे पाहिले जाते. शिमगोत्सवात कोकणात बहुतांशी गावतल्या प्रत्येक वाडीत नमनाचा सुर चांगलाच गवसलेला असतो. श्री गणपती आराधना ( गण ) गवळण, पारंपारिक सोंगे, सामाजिक किंवा प्रबोधनाचा संदेश देणारी नाट्यकृती “फार्स” तर सोबत काल्पनिक, पौराणिक किंवा ऐतिहासिक पार्श्वभूमीवर आधारित वगनाट्य सादर केले जाते. ढोलकी, मृदुंग, टाळ ही पारंपरिक वाद्य आणि विविध चालबद्ध गाणी यांचा मेळ नमनात असतो. नमन या लोककलेत आता अनेक बदल झालेत. वेशभूषा, प्रकाश योजना, संगीत आणि वाद्यवृंद यांनी सध्याची हि नमन लोककला वेगवान आणि रंगीतसंगीत बनली आहे. आता मुंबई रंगमंचावर पहिला नमन प्रयोग पाहणे कोकणवासी व नमन प्रेक्षकांसाठी जणू पर्वणीच असते.
हि कोकणातील लोककला हीच जतन करण्यासाठी आणि रसिक मनोरंजनासाठी विविध क्षेत्रात उल्लेखनीय कार्य करणाऱ्या “ऋणानुबंध पुरस्कार – २०२२” ने सन्मानित असणाऱ्या श्री पाणबुडी देवी कलामंच (मुंबई) तर्फे अल्पावधीत नमन कलेच्या प्रवाहात वेगळीच थाप उमटविणाऱ्या माऊली कलामंच ( मुंबई ) यांचे स्त्री- पात्रांनी नटलेले मुंबईतील लोकप्रिय नमन गुरुवार दि. १२ जानेवारी २०२३ रोजी रात्रौ ८.३० वा. मा. दीनानाथ मंगेशकर नाट्यगृह, विले पार्ले ( पूर्व ) येथे सादर होणार आहे.
दरम्यान प्रदिप रेवाळे लिखित/दिग्दर्शित “पावनखिंड” ही ऐतिहासिक नाट्यकृती सादर होणार आहे. सैतानी वादळ, झुंज, पोशिंदा, सारख्या सामाजिक संदेश देणाऱ्या नाट्यकृती आजवर नाट्य- नमन दिग्दर्शक व कलाकार प्रदिप रेवाळे यांनी रसिकांच्या मनावर अधिराज्य गाजविताना दिसतात. आता पावनखिंड नाट्यकृती मधून रंगभूमीवर नेमकं काय पहावयास मिळेल? ही उत्कंठा मात्र रसिक प्रेक्षकांना लागून राहिली आहे. दर्जेदार आयोजनात होणाऱ्या ह्या नमन प्रयोगाला उपस्थित राहण्याचे आवाहन संयोजकांतर्फे करण्यात आले आहे.
अधिक माहितीसाठी संतोष घाणेकर – ९८३३६८९६४२, रमेश भेकरे- ९५९४३५२८६३, रमेश कोकमकर- ८८५०४२२७११ यांच्याशी संपर्क साधावा असे आवाहन करण्यात आले आहे.
